“تنفس بعمق “
اعتقد ان هى دى النصيحه الوحيده اللى عرفت اطبقها من كتاب اشتريته عن رياضه التايجى
ماعرفش ايه اللى فكرنى بيها وبكل الكلام الى هيتكتب دلوقت لانى كنت قاعده برسم فى كتاب الورش……. فى ورشه السمكره علشان اكون دقيقه
حسيت فجأه انى فعلا عايزه اتنفس بعمق
حسيت انى عايزه اعيش
اعيش زى مانا عايزه
رغم ان انا فشلت فشلا ذرييييييييييييييييييييييييعا فى انى اعمل حاجه ماكنش حباها فعلا او ماكونش عايزه اعملها الا انى حاسه ان فيه حاجات كتييييييييييير اوى نقصانى
كل اللى يعرفونى بيقولوا عنى انى غريبه
دكتور عندنا فى الكليه قالى انتى مش طبيعيه
انا مؤمنه برده انى مش طبيعيه بس برده مش وحشه اوى
عادى يعنى واحده عندها 18 سنه واربع شهور عايشه فى مصر فى الظروف دى فى الزمن ده طبيعى انها ماتبقاش طبيعيه
من زمان اوى ماقعدتش ارغى مع حد ومن زمان اوى اوى اوى ماتكلمتش عن نفسي
حتى لما بكتب هنا بكتب عن مشاعر مؤقته مش عن نفسى بشكل عام ….كمان لما بكتبها بيبقى فيه خيال شويه وتهييس وحاجات كدا
الايام دى سؤال ملح عليا بشكل فظيع …….انا طبيعيه ولا لا؟
يمكن الناس حاسه انى غريبه لانى دايما لوحدى
اصحابى بيستغربوا لانى بسمع فيروز وبقرا لهيكل وبكتب على كل كتبى بحبك يا مصر !
على فكره بيستغربوا جدا انى بقرا الدستور!
وبيستغربوا لانى بروح مكتبه الجامعه اقرا كتب فى الفلسفه!
بيستغربوا انى ممكن اقعد ساعات لوحدى ببحلق فى السقف!
بيستغربوا لما بقولهم انا لو اتجوزت مش هجيب فى بيتى نيش ولا سفره!!!
بيستغربوا لانى لما باجى مرهقه جدا من الكليه بحب امشى كتيييييييييير اوى على النيل واقف فوق الكوبرى !
ولانى عايزه اروح اسوان مشى واقعد على النيل هناك واقضى الليل كله فى معبد الكرنك!
بيستغربوا لانى قصيره ومابلبسش كعب عالى!
ولانى مابخلعش النضاره ابدا !
وبيستغربوا لانى بحب اشترى شرابات !!!فيها حاجه دى؟
انا فعلا بحب اشترى شرابات وهفضل طول عمرى اشتريها! لان انا كدا وحابه ابقى كدا
**********
هو انا فعلا اللى غريبه؟
برده هشترى شرابات !!
***********
انا عمرى ما حاولت اكون حاجه غيرى حتى لو الناس ماقتنعوش بيا زى مانا فعلا
انا عايزه اعمل حاجات كتيره اوى ………عايزه اعيش حياه جديده خالص …..
لما بطلع فى الدور السادس فى المبنى اللى انا قاعده فيه الساعه 3 الصبح واطلع اجرى واغنى على صوتك بالغنا ببقى بجد مبسوطه وابص للنجوم واغنى سألتك حبيبى وماشوفش حاجه لان نضارتى مكسوره “انا نظرى مش ضعيف اوى كدا يعنى”بيبقى نفسى انزل اجرى فى الشارع والدنيا فاضيااااااااااا
وبحسد كل الاولاد اللى ممكن ينزلوا الشارع فى الوقت ده
هو انا فعلا اللى غريبه؟؟؟؟
*********
عارفه ان انا بكتب حاجات غريبه وعبيطه بس فعلا انا عايزه اكتب ده ومش همسحه لان انا كدا فعلا!
ومهما الناس قالت عنى انى غريبه هفضل برده اسمع فيروز واقرا لهيكل وابحلق للسقف ومش هشترى نيش لما اتجوز وهفضل اتنفس بعمق
واهم حاجه انى هفضل برده اشترى شرابات
أرسلت فى انا ودماغى
