Posted by: 2ala2 | أبريل 20, 2007

ليه كدا يا مصر؟؟

عندى اكتئاب ومدايقه جدا

 حاسه ان فيه حواليا حاجات كتيره بتحصل لازم اشارك فيها ومش عارفه

عبدالمنعم محمود صاحب مدونه انا اخوان  اعتقل

انا ماعرفوش الا من خلال مدونته بس بجد بجد زعلانه …..

 نفسى اعمل اى حاجه ومش قادره

 احساس بالعجز والتقصير مع بعض

وايه فيكى يا مصر ما يجبش اكتئاب ؟؟؟

بلد بتاكل ولادها …..اجدع ولاد فيه

اليه كدا يا مصر؟؟

اعرف بنتين واحده فى هندسه والتانيه فى صيدله كانوا مستغربين انى معلقه صوره لحسن نصر الله على الحيطه مره كنت قاعده معاهم وقلتلهم يرسموا خريطه لمصر ويبينوا عليها القاهره والاقصر والفيوم وفرع رشيد وسينا…..

اللى فى صيدله عملت سينا فى السعوديه وعملت رشيد فى دمياط

 واللى فى هندسه عملت القاهره على قناه السويس والفيوم والاقصر جنب بعض وسينا فى الصحراء الغربيه وعملت فرع رشيد جوه البحر الاحمر!!!!!!!!

 البنتين دول مش عارفين ايه اللى حصل فى مصر سنه 56!!

اللى فى هندسه قالتلى تقريبا الاحتلال البريطانى لمصر !!!

هما دول يا مصر اللى انتى بتحميهم والشباب اللى زى الورد ترميهم فى السجون ؟

ليه كدا يا مصر ؟؟؟

دا احنا والله بنحبك

 انا مش عارفه دلوقت ادعى على مين بالظبط ؟

على مبارك ؟ولا على اللى حواليه ؟ولا على الناس اللى بتحاول تفوقنا؟

ولا على نفسى لانى مش قادره اعمل حاجه قاعده هنا غرقانه فى الفيزيا

مش معنى كدا ان الفيزيا مالهاش لازمه بس مش هى مكانى!

كان نفسى ابقى بعمل حاجه لمنعم وكل اللى زيه من ولادك يا مصر!

بتقتليهم وبرده بيحبوكى

 لانهم نضاف اوى

 وشرفاء اوى

ومصريين اوى

 كان نفسى ابقى معاهم واعمل ليكى حاجه واحاول انقذك زى ماهم بيعملوا لانى بحبك يا مصر زيهم تمام

سجلي يا مصر اللحظات دى علشان بكره لما يجى نشاور للاولاد الصغيرين ونقولهم مصر زمان كانت كدا بس شوفوا دلوقت بقت حلوه ازاى علشان فيه رجاله بجد ضحوا عشانها…..خليكوا رجاله كمان واحموها

 معلش يا منعم قلبى معاك  

أرسلت فى بحبك يا مصر

« تنفس بعمق
نداء….ام المريله الكحلى »

Responses

اعتقد ان جهل الناس للمعلوم عن الوطن بالضرورة ليس مدعاة لاحتقارهم او النظر اليهم نظرة دونية لانهم ضحايا لعملية تجهيل وتغريب متقنة و اعتقد ان دعوتهم للانضمام الى الحركة الوطنية ولو بالتعاطف قلبيا افضل من النظر اليهم شذرا ثانيا تتحدثين عن ان مصر تحميهم تقصدين اى مصر اذا كانت مصر مبارك فهى لا تحمى الا السادة العملاء والمبعدين هم اول ضحاياها اما اذا كنتى تقصدين مصرنا فمصرنا غير قادرة على حماية نفسها والاهم من ده كله انا زهقت من ان كل واحد قراء كلمتين زيادة افتكر انه فوق الناس وانه صاحب تفكير الهى لا يدانيه احد ولو عمل حركتين والناس بصت ليه باستغراب اعتبر نفسه شهيد وان المجتمع متخلف وربنا يفك أسر منعم وكل معتقل ويفك أسر مصر كلها

By: بجد زهقت on أبريل 21, 2007
at 1:03 ص

مين قال لحضرتك ان انا بحتقرهم او بنظر ليهم نظره دونيه؟؟؟
انا شخصيا بعتبر نفسى ماعنديش المعلومات الكافيه اللى تخلينى اتكلم عن الحركه الوطنيه كجزء منها بس على الاقل عندى متابعه للى بيحصل
لكن اللى انا بتكلم عنهم مش عايزين يشوفوا اصلا ومش المفروض اننا نلوم عمليه التجهيل والتغريب المتقنه لان اللى فى سنهم واصغر منهم وليهم نشاط ومنضمين للحركه الوطنيه قلبيا او فعليا ماصحيوش من النوم لقوا نفسهم كدا لكن اللى انا بتكلم عليهم فعلا جزء كبير من اللوم يقع عليهم وده رأيي
ومين قال لحضرتك ان مفيش اى دعوه ليهم للانضمام للحركه الوطنيه بس اعتقد ان واحد مايعرفش خريطه بلده هيبقى الموضوع صعب شويه وهما مش صغيرين
بالنسبه بقى للكلام عن مصر فتقدر تقول انه بس مجرد اسلوب انى اوجه كلامى لمصر وانا كنت بكتب وانا متنرفزه جدا وزهقانه اكتر من منك
معاك ان المبعدين اول ضحاياها بس المعتقلين ضحايا برده الفرق ان المبعدين مرتاحين ومش فى دماغهم بس اللى فعلا شايلين هم البلد دى هم اللى بيتعذبوا
عموما ده رأيى الخاص وانا مابتكلمش باسم حد

By: قلقانه on أبريل 22, 2007
at 10:09 ص

عليهم لوم فعلا بس انتى نسيتى ثقافة مجتمع بتخاف من كلاب الأمن اب بيحذر من الكلام عن السياسة وام تموت لو شافت ابنها يقرا كتاب فى السياسة نسيتى الخوف اللى مالى قلوبنا وانتى ما انتى مجرد متعاطفة ومتابعة ليه مش تتحولى لمشاركة انا مش بالوم انا عارف ان (كل ميسر لما خلق له) فبلاش تعتبى على حد واللى بيطلع مظاهرة المفروض يطلع يدافع عن حقه وحق عياله من بعده واعتقد ان دى الثقافة اللى لازم تنتشر اننا نكون انانيين جدا نطلع ندافع عن حقنا وعن قوتنا وقوت عيالنا لان مصر مش هايدافع عنها فرد ضعيف بس الحقيقة اللى شايلين هم البلد بجد الناس الفقرا الغلابة والعامل اللى سمعته فى اضراب بيقول انه بيدى ابنه ربع جنيه وابنه بياخد ساندويتشات من اصحابه فى المدرسة عارفة يعنى ايه ربع جنيه ؟؟؟؟؟؟؟؟؟ والربع جنيه ده ممكن الطفل يعمل بيه ايه فى زمن احمد عز عرفتى مين اللى بيتعذب الاول

By: بجد زهقت on أبريل 23, 2007
at 4:44 م

اولا انا بشكرك انك مهتم وبتعلق
ثانيا انا فاهمه ان دى ثقافه المجتمع وانا شخصيا تحت تأثيرها والدليل انى مابشاركش .تعرف ليه؟ لانى اولا بنت وثانيا عندى 18 سنه وثالثا انا بينى وبين وسط القاهره حوالى 4 ساعات سفر وانا اتمنى فعلا انى اشارك واتمنى ان حد يجى يقنع ماما انى مش صغيره على الحاجات دى .ده بالنسبه ليا وانا ماما متعلمه ومثقفه وفاهمه جدا بس برده خايفه عليا وده طبيعى .اذا كان دكتور عندنا قالى لا اوعى يبقى ليكى نشاط انتى لسه صغيره وهتتبهدلى وتبهدلى اهلك معاكى اذا كان ده موقف دكتور فى الجامعه فاكيد لازم نعذر الناس التانين بس برده اللى عايز حاجه يقدر يعملها انا بنت ومش هضحك على نفسى واقول مساواه لان انا فعلا مقيده بس بحاول وهما كمان المفروض يحاولوا ويتعبوا بس صدقنى فعلا نعظم الشباب مش عايز يتعب واكيد انت عارف
انا شخصيا رغم انى من طبقه تعتبر متوسطه الا انى بعتبر نفسى برده ماعنديش حاجه اخسرها وده على ما اعتقد اللى الشباب مفروض يفهموه …..انهم فعلا ماعندهمش حاجه يخسروها
بس بقى انا شايفه اللى بيشاركوا شايلين الهم مرتين المره الاولى لانهم متأثرين بنفس اللى بيخصل فى كل حته فى مصر والتانيه انهم بيحاولوا يعملوا حاجه
حكايه الربع جنيه حصلت قدامى قبل كده واكتر منها بشكل فعلا مؤسف واتمنى لو كنت اقدر اعمل حاجه

By: قلقانه on أبريل 26, 2007
at 9:32 ص

أولا طبعا بالنسبة لعبد المنعم ربنا يصبره على اللى هو فيه .. لكن برده مين قال إن مصر محتاجة ناس مناضلين أو حتى ثوريين بس؟؟ أنا فاكر لما كان دكتور مصطفى مشرفة فى إنجلترا بيحضر الدكتوراة إندلعت ثورة 1919 وقرر الرجوع والمشاركة فيها .. ولكن قالوا أخوه (على ما أعتقد) إن مصر محتاجة عالم أكتر من ما هى محتاجة واحد ثورى ويقف يهتف فى المظاهرات !! وعليه إستمر وأصبح دكتور مصطفى مشرفة !!
ليه بتقللى من حجم نفسك وتحصرى وطنيتم فى عمل وطنى مباشر أو أشياء من هذا القبيل !! ركزى فى دراستك وعلمك صدقينى ممكن بيه تفيدى بلدنا أكتر من ناس كتير جدا معندهاش غير الكلام !!

By: كريم on أبريل 26, 2007
at 6:14 م

احمد زويل ركز فى علمه واصبح عالم والنهاية حفلة تكريم من مصر ثم تجاهل تام ممدوح حمزة ركز جدا واصبح من اهم مهندسى العالم والنهاية اتسجن والبهدلة عبد الحميد شتا اللى خلوه ينتحر من اليأس والاحباط ومئات غيرهم مصيرهم التجهيل والتهميش ما فيش علم ولا علماء فى ظل مناخ استبدادى كل همه يحافظ على الكرسى ويقتل الشعب دى حاجات بنوهم بيها نفسنا ونبرر خوفنا ويا أستاذ كريم فى عندنا حاجات تانية غير الكلام ولو مش عندنا غير الكلام كفاية اننا كسرنا حاجز الخوف والرهبة وشكرا ليك

By: بجد زهقت on أبريل 26, 2007
at 11:08 م

عزيزى -بجد زهقت- .. أنا مقصدش تهميش الجهود الموجودة أبدا !!! وبالنسبة للأمثلة اللى حضرتك ذكرتها .. أيه اللى هيأثر التهميش الإعلامى على ناس زيهم ؟؟ المهم إيه اللى عملوه وإيه اللى أبدعوه.. وصدقنى هما ممكن يفيدوا البلد بحاجات كتير جدا .. بس برضه كل واحد وعقله !!

By: كريم on أبريل 26, 2007
at 11:58 م

أستاذ كريم اولا احب اشكرك على اهتمامك بالرد واشكرك كمان على الجملة دى-بس برضه كل واحد وعقله - وتعمدك التحقير والاهانة والتهكم بس هل انا اتكلمت عن تهميش اعلامى بس ولا تهميش اعلامى وسجن وتهميش اجتماعى ؟ واى افادة هايقدموها للبلد فى ظل حملة منظمة لازاحة الرموز وابعاد كل شخص يثق به الشعب ؟؟؟؟؟؟؟؟؟؟؟؟؟؟؟؟؟؟؟

By: بجد زهقت on أبريل 27, 2007
at 8:40 ص

يا عزيزى انا مش عارف ليه إنت بتفترض سوء النية فى كلامى ؟؟!!! أنا والله ما أقصد أى أهانى أو تهكم لإنه مش من طبعى !!! وجملة كل واحد وعقله أقصد بيها العلماء اللى برة مصر وأقصد منها إن أكيد فيه ناس عايزة تفيد البلد وأكيد فى ناس عادى عايشة لنفسها !!!! وأخيرا أنا حاولت أتكلم وأتناقش بشكل محترم وأعتذر لو كلامى إتفهم بطريقة غير اللى كنت أقصدها !!

By: كريم on أبريل 27, 2007
at 2:04 م

عبد المنعم هو حالة ظاهرة لشاب وطنى أيا كان أنتمائه السياسى حلول يغير من بلده فلم يسمحوا له
مصر مختطفة بواسطة عصابة ععدها لا يذيد عن 10 وكل أهلها رهائن للوضع القائم
لا تظلموا مصر مصر عظيمة العيب فينا أحنا
أما ه}لاء الشباب فهم ضحية 50 سنة من نظام تعليمى وسياسى فاشل

By: أحمد- وجع دماغ on أبريل 27, 2007
at 7:08 م

كريم
انا طبعا عارفه قد ايه العلوم مهمه بس انت عارف التعليم فى مصر عامل ازاى؟؟؟؟؟مصر مافيهاش تعليم ولو عايز تتعلم بجد اعتمد على نفسك واطلع خد كورسات او سافر بره وشوف التكاليف بقى !!!!!!
انا رأيي ان دلوقت النشاط السياسى المفروض يكون له اولويه يمكن انا بقول كدا علشان انا مهتمه بالسياسه لكن بجد حرام علينا انه يكون فى مصر حد مش مهتم بالسياسه .الاول ناخد حريتنا وبعد كدا هنتعلم صح فعلا.
طبعا مش معنى كدا انى بهمش دور العلماء بس اعتقد ان دى اولويات فى ظروف زى دى فى مصر.
وانا معاك طبعا ان التهميش الاعلامى مابيأثرش بدليل اننا نعرفهم .

بجد زهقت
عندك حق فعلا ان حتى الكلام لو مش كفايه بس بنكسر حاجز الخوف ودا مهم جدا .بس بجد انا كمان ملاحظه انك غالبا بتفترض سوء النيه؟؟؟؟؟

احمد-وجع دماغ
اكيد انا معاك واتمنى اننا نعمل حاجه

By: قلقانه on أبريل 28, 2007
at 9:52 ص

اسف جدا أستاذ كريم لو كنت ظلمتك وربنا يوفقك كتير يا سلمى انتى اسلوبك رائع وسلس وجميل جدا

By: بجد زهقت on أبريل 28, 2007
at 3:08 م

الأستاذ وجع دماغ، ممكن تقوم بتعريف مصر. يعني إيه مصر؟ لما تقول أن مصر عظيمة بس العيب فينا احنا، يبقى ممكن تفهمني إيه هو إللي عظيم؟ أوعى تكون تقصد مصر مبارك؟ لو تقصد مصر مبارك تبقى مصيبة. ولا يمكن تقصد مصر التاريخ؟ لو التاريخ فدة فات وبقى ماضي وممكن نقعد نبكي عليه سنين قدام. ولا يمكن تقصد مصر النيل والسما والجبال والرمل والبحر وكل الجغرافيا؟ أحب أقولك ان النيل ملوثـ والسما فيها دخان والجال مالية الدنيا والرمل بنوا عليه شاليهات والبحر فيه مجاري. إزاي بقى مصر عظيمة؟ أنا أفهم ان أي بلد بتبقى عظيمة بشعبها. مصر كانت عظيمة. تحياتي

By: autoscriptor on مايو 4, 2007
at 10:43 م

اود ان اقول انى مبهور بطريقة عرضك لحساساتك المرهفة التى تنم على انك شخصية عميقة و ليست سطحية و انى احسست انى و انا اقراء المدونات انها ليست اليكتزنات معروضة على شاشة من الزجاج بل هى شرح لعوالم كثيرة خاصة بيكى و اسلوبك فى الكتابة جميل جدا. ايضا انا فتحت السايت بتاعك صدفة و انا فى الشغل كنت بدور على كلمات اغنية للطيفة اسمها اكتر من روحى بحبك واقيت السيت بتاعك (قلقانة) حقيقي مش عارف اوصفلك مدى سعادتى لنا قريت كلامك انتى اكبر من سنك فى افكارك انتى ليس من هذا الجيل انتى من جيل تانى مالوش زمان افكاره حره و رقيقة قلما تكون موجودة الان . اتمنى تقرائى رسالتى دى لانها مليئة بالاعجاب بافكارك الرقيقة و العميقة . اتمنى ان تراسلينى على ايميلى الاتى ghanem_955@hotmail.comواتمنى ان تصلك رسالتى وان لاتكون مجرد رسالة فى زجاجة
ايمن غانم
القاهرة

By: ايمن غانم on مايو 8, 2007
at 9:35 ص

نسيت اقول حاجة مهمة انا معجب جدا بفكرة انك تحبين ان تكونى انتى .. هى انتى اغلى شيء فى الدنيا مش مهم ان الانسان يخسر اي حاجة تانية غير نفسه اغلىشىءهو ان يكون الانسان نفسه ومايدحكش على نفسه انه انسان تانى لاء هى دى السعادة الداخلية (كن انت نفسك ). انتى شخصىة رائعة.
ايمن غانم
القاهرة

By: ايمن غانم on مايو 8, 2007
at 9:54 ص

بجد زهقت
بجد شكرا

autoscriptor
بص انا هقولك على حاجه بصرف النظر عن ان ازاى مصر عظيمه فانا بحبها بطريقه بجد مش ممكن تتخيلها ….مصر عظيمه عشان هى مصر …انا اتولدت لقيت نفسي بكتب اسمها على ايدى وعلى كشاكيلى وشايفها حواليا ومش قادره احلم بحاجه مافيهاش اسم مصر ….انا متفائله جدا يمكن لانى صغيره ويمكن لانى صح ….

استاذ ايمن
انا مش عارفه اقول ايه بجد ؟؟
شكرا جدا واكيد ورسالتك وصلت وانا مبسوطه بيها جدا

By: 2ala2 on مايو 8, 2007
at 3:40 م

Leave a response






Your response:

التصنيفات